Համալիրի ներքին բակում, որը դիմավորում է այցելուներին, գտնվում է ընդունարանի գոտու փոքրիկ նախասրահը. շենքը երեսպատված է կոպիտ քարե շարվածքով, որը մասամբ կիրառված է նաև ինտերիերի ձևավորման մեջ՝ լրացվելով կերամոգրանիտի, փայտի և բետոնի տեքստուրաներով։ Ընդունարանի սեղանից բացի, նախասրահի կենտրոնական մասում է փոքրիկ հանգստի գոտին՝ ժամանակակից մինիմալիստական դիզայնով պատրաստված բուխարիով։ Բնական քարը և փայտը, կրակը և պանորամային ապակեպատումը, շրջապատված ծառերով և թփերով, ստեղծում են բնությանը մոտ լինելու զգացումը, որը BOON II-ի ընդհանուր հայեցակարգի կենտրոնում է։

10 բնակելի տներից 7-ը մեկհարկանի են և նախատեսված են փոքր ընտանիքի՝ երկու մեծահասակի և մեկ երեխայի կամ պատանու համար։ Դրանք կազմված են ընդարձակ հյուրասենյակից, որը համակցված է խոհանոցի հետ և ունի ուղիղ ելք դեպի տերասա՝ սեփական BBQ գոտիով, մեծ ննջասենյակից և սանհանգույցից: Յուրաքանչյուր տան ներքին ձևավորումը տրոպիկական տան և լեռնային շալեի ոճերի յուրահատուկ համադրություն է։ Առաստաղը պատրաստված է փայտե գերաններից ու ծածկույթից, որոնք կատարում են բնական կառուցվածքային գործառույթ և չունեն դեկորատիվ նշանակություն։ Ինտերիերը լրացված է մեծ քանակությամբ փայտով և բաց գույներով, որոնք չեն շեղում ուշադրությունն ու ճիշտ են համադրվում պանորամային ապակեպատման հետ՝ առանձնահատուկ ընդգծելով տեսարանը դեպի լեռներ և կենդանի բնություն։

Տան մուտքի մոտ գտնվում է ընդարձակ նախասրահ՝ մեծ ներկառուցված պահարանով, որը նախատեսված է իրերի պահման համար և ունի դրա մեջ ինտեգրված նստարան։ Մուտքի դռան կողքին տեղակայված է տեխնիկական սենյակ՝ ջեռուցման կաթսայով, կոմունիկացիոն հանգույցներով և մաքրման պարագաներով։ Նախասրահից հյուրերը անցնում են ընդարձակ հյուրասենյակ, որը համակցված է ճաշասենյակի և խոհանոցի գոտու հետ։ Միևնույն ժամանակ, հյուրասենյակի բազմոցը բացվող է և, անհրաժեշտության դեպքում, հնարավորություն է տալիս տեղավորել երկու երեխա կամ մեկ մեծահասակ։ Ննջասենյակում կա երկտեղանոց մահճակալ և մեծ պահարան, ինչպես նաև ուղիղ ելք դեպի BBQ գոտիով տերասա։

Լիարժեք սանհանգույցը համակցված է ընդարձակ լոգախցիկի հետ և ստեղծված է ընդհանուր ինտերիերի ոճով՝ համադրելով փայտի և կերամոգրանիտի հյուսվածքները։ Այն հագեցած է հյուրերի համար անհրաժեշտ բոլոր պարագաներով։

Միահարկ տան հիմնական տերասան, որը համակցված է BBQ գոտու հետ, նախատեսված է չորս հոգուց բաղկացած խմբի հարմարավետ հանգստի համար։ Տերասայի վրա կա սեղան, փոքրիկ բազմոց և բազկաթոռներ։ BBQ գոտին համալրված է մանղալով՝ գրիլից մինչև ապխտման հնարավորություներով, ինչպես նաև ուտեստների պատրաստման համար նախատեսված առանձին սեղանով։

Երկհարկանի երեք տները ստեղծված են միահարկ տների հետ միացյալ ոճով, սակայն նախատեսված են ավելի մեծ խմբերի համար՝ չորս մեծահասակ և երկու երեխա կամ դեռահաս։ Մեծ տան առաջին հարկում գտնվում է ընդարձակ նախասրահը՝ վերնահագուստի համար նախատեսված պահարանով, ներկառուցված կոնսոլով և մեծ փափուկ աթոռակով, հյուրերի համար նախատեսված սանհանգույցով, որն ունի լիարժեք լոգախցիկ, հյուրասենյակով, խոհանոցով և 6 անձի համար նախատեսված ճաշասրահով։ Հյուրասենյակի բազմոցը, ինչպես միահարկ տների դեպքում, բացվող է և թույլ է տալիս լրացուցիչ տեղավորել մեկ մեծահասակի կամ երկու երեխայի։

Տան երկրորդ հարկում տեղակայված է երկու ննջասենյակ. գլխավոր ննջասենյակը՝ մեծ մահճակալով, դիմահարդարման սեղանիկով, առանձին հանդերձարանով և ելքով դեպի պատշգամբ, ինչպես նաև երկրորդ ննջասենյակը՝ համեմատաբար ավելի փոքր երկտեղանոց մահճակալով, իր զգեստապահարանով և ելքով դեպի պատշգամբ։ Ննջասենյակներից բացի, երկրորդ հարկում գտնվում է ընդհանուր սանհանգույց՝ մեծ լոգախցիկով, որն ունի բնական լուսավորություն։

Երկհարկանի տան BBQ գոտին միացված է մուտքի տերասայի հատվածին և նախատեսված է 6-8 անձից բաղկացած մեծ խմբի հարմարավետ ժամանցի համար: Այն համալրված է բոլոր անհրաժեշտ պարագաներով՝ լիարժեք BBQ-սարքավորմամբ, որը ունի գրիլի և ապխտման բոլոր հնարավորությունները, պատրաստման սեղանով, ինչպես նաև մեծ սեղանով, բազմոցով և բազկաթոռներով։

Անկախ նրանից, թե հյուրանոցի որ տանն են կանգ առել հյուրերը, նրանք կարող են ընտրել անձնական խոհարարի ծառայությունը, որը կպատրաստի մենյուից ուտեստները հենց իրենց անձնական BBQ գոտում։ Բացի այդ, համալիրը տրամադրում է սեփական լիարժեք խոհանոց, որի ուտեստները նույնպես հնարավոր է պատվիրել և մատուցել տան ներսում։