Առաջադրանքի բարդությունը կայանում էր նրանում, որ առևտրի և զվարճանքի կենտրոնը պետք է ինտեգրվեր արդեն ձևավորված նախագծի մեջ, և, որ ամենակարևորն է, դա պիտի արվեր օրգանական և կոկիկ կերպով՝ չխախտելով ընդհանուր հայեցակարգը և պահպանելով համալիրի բարձր դասը։ Միևնույն ժամանակ, այս կառույցը պետք է մանրակրկիտ մտածվեր գոտիավորման արդյունավետության, այցելուների տեղաշարժի սխեմաների և օգտագործման հարմարավետության տեսանկյունից՝ իր կոմերցիոն ներուժն ամբողջությամբ իրացնելու համար:

Մշակված նախագծային լուծումը պետք է միավորեր առևտրի կենտրոնի շենքերը և դրան ամենամոտ 12 հարկանի բնակելի մասնաշենքը մեկ ճարտարապետական ամբողջության մեջ՝ դրանով հասնելով կառույցի օրգանական ինտեգրմանը և, միևնույն ժամանակ, ճարտարապետական հնարքի շնորհիվ սահմանազատելով համալիրի հանրային և մասնավոր տարածքները:

Առևտրի և զվարճանքի կենտրոնը ներառում է ստորգետնյա և վերգետնյա փակ ավտոկայանատեղ, որոնք նախատեսված են ինչպես առևտրի կենտրոնի հյուրերի, այնպես էլ համալիրի բնակիչների համար; երկու հարկ կոմերցիոն տարածք և եռաստիճան սպորտային և SPA համալիր՝ տեսարանով լողավազանով և կոկտեյլ-բարով, որոնք գտնվում են տանիքում։

Ռելիեֆի առանձնահատկությունների և համալիրի՝ զառիթափ լանջի վրա գտնվելու շնորհիվ մենք կարողացանք ստանալ յուրահատուկ էֆեկտ, որը առանձնացնում է առևտրի կենտրոնը և կոկիկ տեղավորվում այն ընդհանուր ճարտարապետական կառույցի մեջ. գլխավոր փողոցից տեսարան է բացվում միայն դեպի համալիրի գլխավոր՝ առաջին հարկ, որի տանիքը շարունակվում է և միանում հարևան 12 հարկանի շենքին՝ ստեղծելով ընդհանուր օգտագործման ընդարձակ ու բաց տարածք։

Առևտրի կենտրոնի ընդհանուր մակերեսը 9000 քմ է. ստորին հարկում կա մեծ մթերային սուպերմարկետ՝ ապրանքների բեռնման և բեռնաթափման համար նախատեսված առանձին տարածքներով, կենցաղային տեխնիկայի խանութ և կինոթատրոն; վերին հարկում հիմնական վաճառքի տարածքներն են, որոնք նախատեսված են բուտիկների, սրահների և մանկական ժամանցի գոտիների համար: Վերին հարկում կա նաև առանձին տարածք մեծ գաստրոմարկետի համար, որտեղ կտեղակայվեն մեծ ու անկախ ռեստորանային նախագծեր, որոնք ներկայացնում են ճաշակի ու տարածաշրջանային մեծ բազմազանություն։ Յուրաքանչյուր հարկի ընդհանուր օգտագործվող մակերեսը կազմում է ավելի քան 3600 քմ։

Սուպերմարկետի տեղադիրքի շնորհիվ ստորին հարկում կարողացանք բարձրացնել այցելուների հոսքի արդյունավետությունը կենտրոնի առևտրային տարածքում և, համապատասխանաբար, ավելացնել առաջին հարկի տարածքների կոմերցիոն գրավչությունը։ Բացի այդ՝ ներքին գոտիավորման տրամաբանությունը թույլ տվեց ապահովել նաև չորս դահլիճ ունեցող կինոթատրոն՝ գլխավոր փողոցից սեփական մուտքով։

Շենքում ինտեգրված եռահարկ ֆիտնես և SPA համալիրը ներառում է հարմարավետ բազմաֆունկցիոնալ սրահներ, տանիքում բաց տերասաներ խմբակային պարապմունքների համար և SPA տարածքներ պառկաթոռներով, ինչպես նաև ընդարձակ 25×15 մետրանոց լողավազան՝ համայնապատկերային տեսարանով դեպի ծով։

Առևտրի կենտրոնի տանիքի բնական կանաչապատումը ծրագրված է այնպես, որ մի կողմից ծավալի և թեթևության էֆեկտն ապահովի՝ այգին կապելով շրջակա միջավայրի հետ, մյուս կողմից՝ էլ ավելի մեկուսացնի սպորտային համալիրը կից բազմահարկ շենքի բնակիչներից։

Մեկ այլ աչքի ընկնող կառույց, որը լրացնում է առևտրի կենտրոնի շենքերի և բնակելի շենքերի համալիրի ամբողջությունը, յուրատեսակ բաց պատկերասրահն է, որը ձևավորվել է տարածքի ռելիեֆով․ առևտրի կենտրոնի արևմտյան կողմում առկա է բարձրությունների մեծ տարբերություն: Այս տպավորիչ վայրում՝ իջվածքի վրա կախված շենքի տակ, նախատեսվում է կազմակերպել արվեստի տարածք՝ գեղանկարչության պատկերասրահով և բազմազան ցուցահանդեսների ու միջոցառումների անցկացման հնարավորությամբ։

Ընտրված լուծումը մի կողմից, հարմարեցրեց լրացուցիչ տարածքը դրա պրակտիկ օգտագործման համար, և, որ ամենակարևորն է, թույլ տվեց իջեցնել առևտրի կենտրոնի շենքի ստորին կետը դեպի հողատարածքի ստորին մաս, ինչի շնորհիվ հնարավոր դարձավ շենքի տակ եռահարկ ստորգետնյա կայանատեղիի ստեղծումը սահմանված չափանիշներին համապատասխան: Այսպիսով, շենքերի համալիրի տակ կա հինգ հարկ ավտոկայանատեղ (երեք ստորգետնյա և երկու վերգետնյա), որոնք համալիրի բոլոր կայանատեղիների հետ միասին ունեն մոտ 30000 քմ ընդհանուր մակերես և ամբողջությամբ ծածկում են առևտրի կենտրոնի բնակիչների և այցելուների կարիքները:

Բացի ստորին հարկում տեղակայված պատկերասրահից, բնակելի շենքի 13-րդ հարկում կա պանորամային լաունջ-բար դեպի ծովը և համալիրի ողջ տարածքը տեսարանով (շենքի բնակիչների հարմարավետության համար այս հարկը մեկուսացվել է բնակելի տարածքներից լրացուցիչ տեխնիկական հատակով):

Շենքի բոլոր բնակարաններն ունեն իրենց բաց տերասաները, իսկ առաջին բնակելի հարկի տերասաները միմյանցից և հանգստի գոտուց առանձնացված են են կանաչ ցանկապատերով և փոքրիկ մասնավոր այգիներով, որոնք թույլ են տալիս արդյունավետ կերպով առանձնացնել հանրային ու մասնավոր օգտագործման տարածքները։ Բացի այդ, առևտրի կենտրոնի հետ համակցված բնակելի շենքն ունի առանձին մուտքի խումբ և առանձին մեքենայի մուտք, ինչը լրացուցիչ գաղտնիություն է ապահովում համալիրի բնակիչների համար։

Այս նախագծի մեկ այլ կարևոր մասն էր կազմում առևտրի և զվարճանքի կենտրոնի գիշերային լուսավորության հայեցակարգի մշակումը, որը թույլ է տալիս արդյունավետորեն ընդգծել առևտրի կենտրոնի մուտքի խումբը և դրա վրա առկա գովազդային տարբերանշանները՝ միևնույն ժամանակ չստեղծելով ավելորդ լուսային աղմուկ ինչպես հարակից բնակելի շենքի, այնպես էլ բնակելի համալիրի մյուս բնակիչների համար։